M3 Italian (已結業)

一嗌完嘢食侍應就放低麵包，麵包烘得微微溫暖，本身已經充滿住香草嘅香味，再點少少油醋汁，簡直想再食多一個啊。黑松露忌廉湯充滿著黑松露嘅香味，唔知係咪用咗好多忌廉打成嘅關係，口感特別細滑，上面嗰塊麵包經過特別嘅調味，成為一個好好嘅點綴。香辣蒜片啤酒煮蜆，啲蜆隻隻都新鮮飽滿，喺香濃嘅蒜味底下隱隱咁樣滲出啤酒嘅香味，個味道夾得好好。法國鴨肝雲吞配蕃茄醬，意大利雲吞就食得多，但係用鴨肝做餡嘅都係第一次，平時食嗰啲意大利雲吞個餡料通常都無乜味，主要都係靠個蕃茄汁，有啲仲好似係食緊番茄汁嘅雲吞皮咁添，呢個鴨肝雲吞令我顛覆咗對意大利雲吞嘅感覺，只要你一咬開個內餡，啲鴨肝味就會即刻充斥著你成個口腔，再加上面頭蕃茄醬裏面嘅黑松露呢一個神來之筆，黑松露味，鴨肝味同蕃茄味喺口腔入面混和嘅感覺，真係有今生無來世。烤安格斯肉眼扒配蘆筍苗焗蒜頭及長薯仔，肉眼扒肉味香濃，廚師將兩邊煎得香脆，肉汁被緊緊鎖住，蘆筍苗倍添鮮嫩，並沒有平時近根部所有嘅渣宰，焗蒜頭若然再焦脆多一啲相信會更加好。