陳儀興玫瑰餐廳

營業中

休息中

喺附近體育館打完波，轉個彎去番新蒲崗，最近爵祿街，寧舍一間餐館，離遠望入去見好多酒樓用嘅大圍板檔住窗，初時以為私房，門口好靜，斗膽推門入去，仲以為冇乜客，點知坐滿九成，大部分都係打邊爐。本嚟接近端午唔熱都暖唔多想食火鍋，不見咁墟冚，加上啲食材有啲另類嘢揀就試吓。枱主要六至八人大枱為主，近舖邊旁有四人枱。俾左一大碗熱水嚟洗杯洗碗筷。一睇餐牌，咦，又陳儀興？一問之下原來係另一兄弟開嘅。揀咗鍋底「杏汁白肺湯底」，冇白費揀佢，以88蚊嚟講有廿舊左右大大舊豬肺俾到嚟，加上一路煲住一路聞到杏仁霜咁嘅堅果香都幾舒服，不過要留意豬肺未夠腍，預咗要滾多半個鐘先食就近磅。見圖一大不銹鋼盤嘅醬料、生蒜、蔥花、辣椒等係侍應拎嚟，自添完就會攞走，食材有伏有服，以下介紹：芫荽一碟，仲係剁碎3棵嘅份量，顯得小家子氣，收22蚊嘅話真有啲那個……寧願佢原棵洗乾淨上碟，起碼望落份量都多啲啦。蟹柳拼魚片頭，盛惠43蚊，每款4舊……又係粗嘢當矜貴咁嘅份量，加上蟹柳放鍋不消幾分鐘就飛散哂都撈唔切，感到第二伏。條氣順番啲係見到跟住啲食材。初時搞錯牛爽肉係乳白色有陣牛油味嗰啲牛胸爽，原來係胸前肋骨中嘅軟骨，約十片，原片牛舌咁大細，