百好宴會廳 (已結業)

酒樓一周年，晚市兩位以上惠顧送例牌燒鵝，仲唔計茶錢同加一，好似好著收咁喎！於是來幫襯。可能因為做推廣，平時間酒樓都無乜人幫趁，今晚竟然要等位，就算連接待員，都好似唔係好慣晚市有人等位，面對等位的客人愈來愈多，個接待員六神無主咁，我地剛報完幾位，轉頭又問；嚟多咗人，見你企係度，又再問，結果問左成四五次，先有另一個睇嚟經驗豐富的經理，識得派"飛"畀等位的客人。等咗差不多半個鐘，先入到席，埸內果然爆，但泰半打邊爐。小菜菜牌僅得一頁前後兩版，一版主打海鮮，另一版主打小菜，選擇不多，價錢偏貴，普通炒菜都要六十元碟，肉類小菜動輒七、八十，比起平時貴咗最少20%！所謂優惠，原來都羊毛出在羊身上。由於得兩個人，諗住仲有燒鵝送，只點咗兩個菜，分別是：- 金銀蛋莧菜：碟頭都幾大，做得OK，不過不失。- 京蔥炒牛肉：好香口，京蔥吸咗啲醬汁好惹味，但啲牛肉，醃到無哂質感同味道……至於隻送贈O既例牌燒鵝，由於太多人幫襯關係，酒樓應接不暇，O係我地食完哂所有餸先送上嚟，燒鵝皮都算香脆，肉質都算滑，都係不過不失啦！雖然整體水準不差，但本著優惠先幫趁，結果計落同平時價錢差唔多，始終覺得唔係咁抵囉！