佳記甜品 (已搬遷) 新店位置

之前兩次入嚟三聖食海鮮，跟手都會揸車過元朗佳記食涼粉，今次大家晌容龍食海鮮食到咁高「慶」，就更要食番啲冰凍嘅涼粉降吓溫，更可以延續依份傳統。癈話就唔多講喇，都已經3年第3次寫佳記，所以，兩張環境相交待晒當晚現場環境，有口皆碑，就自然多人捧場 。再嚟就餐牌底面兩張相交待晒最新嘅價錢，睇番B仔涼粉嘅定價，由前年嘅$70，到舊年嘅$72，至今時今日嘅$75，加幅依然好溫和 ，但對比啲相，份量仍然咁巨無霸。 B仔涼粉 $75 正如以前都講過，嚟B仔涼粉與其叫嚟食飯後甜品，倒不如叫食飯後果啦。兩大兜生果山，睇見都開心，我哋11個麻甩佬，每人至少分到兩碗。以前就貪得意會數吓有咩生果，總共有幾多款，但依家就懶理，為咗唔好跌到成枱都喺，由小弟先負責分生果，再添涼粉，灌滿花奶，入口冰涼清爽，甜甜滑滑。忽發奇想，B仔涼粉都算喺食咗好多年，見佢都似喺無咩點變，生果款式亦以罐頭貨居多，唔知有無可能，將來有朝一日限定推出升級版，全部以新鮮生果入饌呢 ！