爆丼屋 (已搬遷) 新店位置

今晚我們行過旺角豉油街見到有間新開嘅「爆丼屋」有好多人排隊，同埋睇到店外嘅廣告燈箱播出嚟嘅圖片好吸引，所以我們就決定喺度食晚飯！我們叫咗三色海膽盛丼、爆盛慢燒牛肉丼「大」、重量級燒牛扒盛丼同燒鰻魚盛丼！三色海膽丼其中兩款海膽都幾鮮甜，但另一款嘅海膽就有啲啲臭嘅味道！爆盛慢燒牛肉丼「大」係將啲牛肉燒至半熟，所以肉質相當嫩滑，配埋芝麻醬一齊食，感覺唔會好膩！重量級燒牛扒盛丼嘅牛扒燒得有啲過熟，令到肉質比較硬實！燒鰻魚盛丼嘅鰻魚肉質都幾軟滑彈牙，鰻魚汁嘅味道唔會好鹹！總括：幾款丼嘅擺設賣相非常精緻吸引，份量超多，都幾抵食，但有啲嘅味道就唔係想像中咁好，有啲名大於實嘅感覺！