泰一流泰國菜 (已結業)

舖面得六張4人卡位，典型小店格局。半隻泰式海南雞已去九成幾骨，雞皮下起到層啫喱，尚且有啲雞味。炸蝦餅本身4件，自行分為8件半形，麵包糠外皮脆，內心熱到辣咀，口感彈牙。串燒雞豬有啲懸念。雞肉勻咗少許蔥段逐粒串；豬肉一塊過，竹籤寧舍粗身似現成串燒package。兩款口感同好食度都係雞肉優勝。提供嗰個咖哩色醬汁就唔夠杰身又唔夠味，似用水稀釋過。泰式鮮蝦炒金邊粉，甜酸汁都幾重手，頗甜，有啲冚咗蝦味。馬拉盞通菜，有啲偏鹹。叫杯芒果沙冰，姐姐仔叫我地先飲幾啖，以為咩事，原來佢話將榨汁機剩番啲芒果沙冰倒埋俾我哋費事嘥，呢啲貼地嘢認真小店特色。