龍鳳冰室 (已結業)

星期日去天后剪頭髮前順便搵地方食lunch，路過電器道見新開咗龍鳳冰室所以去試吓。 由於唔係太肚餓所以叫咗個茶餐加杯綠豆冰。波蘿包+炒蛋 - 波蘿包都幾大個熱辣辣皮都好脆，但係炒蛋就少咗啲質感味道普通。雞翼火腿意粉 - 兩隻豉油雞中翼一般，兩片火腿麻麻地，湯夠熱意粉ok多。綠豆冰 - 出面唔見有綠豆冰所以叫嚟試吓，坦白講淨叫或餐轉加錢都可以話係昂貴，當然有期望啦。 賣相夠靚，玻璃杯睇到綠豆佔1/3都幾大粒但我鐘意淋身啲，白色部分我覺得有椰汁味似椰汁打冰，但係冰粒頗多，可以打幼身啲或少啲會食得方便啲，上面有一球雲尼拿雪粒，十分豐富。埋單一個人要七、八十蚊都幾高消費，不過都有幾多人幫趁可能天后嘅街坊消費力夠強。