金不換泰國餐廳 (已結業)

放工走去荃灣廣場搵食，但原來呢個商場冇乜選擇，餐廳種類好似比其他附近嘅商場少，但又唔想行出去漫無目的咁搵，最後決定留喺商場食泰菜。呢間餐廳喺商場地庫，一落扶手電梯就見到，都幾易搵。我哋大約七點去到，唔使等位，餐廳坐咗七成客左右。呢度嘅環境好有泰國resort渡假嘅感覺，以深木色系做主調，如果有埋resort嘅香味就好啦！打開餐牌，發覺呢度嘅價錢都算偏貴，不過環境同地理位置都好好，搶返分。我哋叫咗燒豬頸肉同埋青咖喱牛肉炒河粉。豬頸肉嘅份量都幾多，但食落冇乜特別，冇乜炭燒嘅味道，而且肉質比較乾身，冇乜肉質。而炒河粉表現正常，河粉都幾煙韌，牛肉片唔算老，唯獨是個咖喱汁唔夠青咖喱味，好似只係食緊一般咖喱咁。呢餐飯唔算特別好食，都唔算難食嘅。不過呢個價錢，會期望更加高質啲啲。下次都係食返啲特色小食店開心啲！