五斗米 (厚和街)

營業中

休息中

今日我地又去咗堅尼地城食午飯，沿着厚和街搵食。哩間餐廳，我地2個都未曾食過，所以入去試一試。我哋叫咗兩個肉燥飯，另加拼盤。個肉燥飯唔夠香，都冇滷水嘅甜味。跟餐嘅滷水蛋亦都滷左好耐，已經裂晒。唯一可以讚嘅係跟餐嘅燙青菜。個菜係用咗櫻花蝦米煮，所以好香蝦米嘅味道，個菜好入味，我覚得個配菜仲好食過主菜肉燥。食食下，聽到大少「涸落，涸落」，之後吐咗好大粒沙出來，起碼吐咗2粒。大少碗肉燥飯只食咗一半，吐沙之後，已經再無心情繼續食。輪到拼盤，有花枝，貢丸，滷蛋，滷豆腐。花枝同貢丸，只係超級市場買到嘅貨色，而滷蛋亦滷到裂開。個滷豆腐有d得意，個質感唔似豆腐，有少少彈牙，有d似食緊蒟蒻。總括來說，呢個台灣菜有別於我平時食開嘅台灣小吃，唔知有冇分台中，台南，台北嘅分別。我只可以講，大少食飯食到大大粒沙，個評分一定唔會好啦。