金啫の鍋 (已結業)

宵夜時段食雞煲，諗起都覺得開心，今次仲搵到間好食又抵食既，就更加開心。七樓一出𨋢就係，L形落地玻璃，坐位又寬敞乾淨，環境唔錯架。調味料擺放都好講究。有啤酒汽水任飲，最特別係有水果茶，睇下幾靚，每瓶都係$15 ，試得過架。雪櫃放左近七十款新鮮食材，一小份咁用小碟裝好，比起一般自己夾既，更乾淨方便。食雞煲前要睇金啫攻略，如果非繁忙時間，店員會主動幫忙架。雞煲一開蓋就香氣撲鼻，辣味剛剛好，店員會另外準備一碟醬料，可以隨時自己加辣。雞肉鮮嫩，配料又夠，非常惹味。特別招待既海產，按人頭分配架。鮑魚仔爽口彈牙，蟶子好鮮味，最得意係隻蝦，初既仲諗係咪就咁可以食，好彩問下店員，原來都係要煮過先食既，蝦肉又彈又鮮甜，水準唔錯。食食下會有店員帶你去抓蜆，用雙手一抓落碟，抓得多食得多，之後店員會數數，睇下可唔可以打入排名榜架，好彩我都唔係包尾😂真係好創新，好好玩。估唔到d蜆細細隻，但全部都好新鮮，無沙兼開晒口架，非常鮮甜，我同朋友2個人，食晒70隻，正！一路掛住食，原來影得一張邊爐料相，雞子唔係度度有，呢度又大粒又新鮮。食物有水準，店員好細心，又親切有禮，下次會再黎過。