靚煲皇 (已結業)

呢晚約咗來自港九新界嘅朋友，最好就緊係約喺中間點見面，旺角就係不二之選，但要避開人多擠迫嘅地方，所以就約咗去呢度食飯。坐低就先上餐前小食-花生，邊食邊傾計，食食吓啲餸都上枱啦!朋友鍾意食大腸，佢就即刻叫咗個黃金炸大腸，大腸外皮炸得香脆，下面墊有菠蘿，作為前菜真係唔錯!再嚟就係另一香口小食黃金脆豆腐，一啖一粒唔覺唔覺就食完。凍食滷水拼盤有豬生腸、鵝翼、鵝掌同鵝腎，樣樣都係脆口嘢，愈食愈想食，點埋個白醋汁更加增進食慾。我哋叫咗個水煮肥牛，牛肉嫩滑，配菜有寛粉、芽菜等，食完仲可以用啲汁嚟打邊爐，所以又叫咗其他打邊爐配料。手打四寶丸爽口彈牙，味道鮮美，好食!即炸響鈴卷係索汁之選，即炸食落係唔同啲， 索完汁之後都唔會太淋，有咬口。朋友鍾意食豬紅同黃沙豬膶，所以都有叫嚟打邊爐。鮮菜籃有幾款蔬菜，加埋落啲辣汁，吸晒啲辣味，變咗水煮菜咁。惠顧四款小菜或以上，就會送紅香桂花糕，剛好用作解辣嘅飯後甜品。