食臺

營業中

休息中

今日係葵芳行街行到攰, 平時我都會係波地呢邊搵間茶餐廳飲杯奶茶食件多士抖下, 行左一圈發現呢間新開嘅餐廳"食臺" 裡面人唔多, 簡潔裝修靜靜坐下仲舒服過去商場坐cafe。從侍應手上接過menu我點左份法式芝士流心蛋厚多士同杯奶茶。杯奶茶大大杯味道就不過不失啦, 反正我期待嘅係厚多士, 數分鐘後厚多士出現係我面前, 將外脆內軟嘅多士挖空, 然後放入芝士同半熟流心蛋, 賣相同心思帶比我唔少驚喜。而味道亦唔錯, 香濃蛋汁配上芝士一d都唔覺得膩, 呢份多士一定推介比身邊嘅人試下。係葵芳呢度唔係幫襯連鎖集團, 就係質素參差嘅茶餐廳, 同埋大量米線鋪(譚仔都有4間), 呢類小店真係買少見少,價錢唔係貴但係出品有質素亦好有心機, 日後一定會多多幫襯。