囍慶酒家

營業中

休息中

幾個朋友興起約食飯，揸住架車四圍兜，忽然落起大雨。正當大家都擔心商場人多泊唔到車，有人提意去科學園。果然科學園車位充裕，泊好車就沿天橋入商場，囍慶，門口放左好多優惠推介又唔洗等位，大家都贊成試下。入座之後感覺舒服，唔會好似其他酒樓咁嘈雜，光線同冷氣都很適中。菜牌好多選擇，價格都幾實惠。第一個驚喜係前菜，花生酸菜青瓜雲耳，酸度甜度剛剛好，超級開胃。先黎個杏汁燉白肺湯，$168一大盅，夠哂位用。豬肺洗得好乾淨無臊味，杏汁口感幼滑超濃郁。强力推介！跟住到上湯龍蝦伊麵，$128真係抵，味道鮮美，感覺唔會太油膩。再黎係星州胡椒蟹，少少甜辣，胡椒味剛好，十分惹味。粉絲底煮得軟硬適中，吸哂鮮甜蟹味同惹味醬汁，真係無得彈！有龍蝦有蟹，又點少得蝦仁呢？呢個琥珀合桃炒蝦仁係另一個必食推介。西芹清爽無渣，蝦仁彈牙爽脆份量足。最正係琥珀合桃，香甜酥脆，真係停唔到口。最後係片皮鴨兩食，鴨皮燒得香口薄脆。七彩炒鴨絲份量十足，絶無欺場。夠哂惹味，送飯一流。總括而言，覺得性價比高，服務亦好殷勤。大家最後都好滿足咁捧住個肚走。朋友們都約定下次試下佢地個海鮮餐。