仁寶小館 (已結業)

星期六嗰晚同老公兩個九點幾至開始搵食，一路由天后電器道行到落去和富道都唔知食mum好，諗住去新和富點知十點都仍然係坐無虛席，唯有再行過隔離仁寶．咁啱有一枱客走，拿拿聲坐低．一坐低阿姐已經問飲咩茶，行動迅速．我老公本來話想食蟹，但係一來時價唔知收幾錢，二來第一次食唔知靠唔靠得住，於是就點咗D普通嘢先試咗先．兩個人點咗3個餸：辣酒煮大蜆－初初諗住48蚊份量唔會多得去邊，點知上枱時比佢嚇咗一跳，一大煲滿滿ge大蜆（雖然後尾至知原來煲底墊咗大量蔥同蒜）但起碼都有15,16隻．好新鮮鮮甜，只係偶爾1,2隻有沙．個湯底越食越辣，但越飲越過癮，同埋好鮮甜，原來佢哋加咗大量蝦乾同菜甫喺過湯裏面，唔怪得知．士多啤梨骨－賣相非常吸引，7大舊鮮紅欲滴ge排骨放喺一塊炸過ge錦鹵雲吞皮上面，D排骨做得好嫩，入後即化，但就真係食唔到有咩士多啤梨味，味道似京都骨多D，此為敗筆，同埋食兩舊已經幾漏，要人多至好嗌．魚湯鮮貝浸娃娃菜－鮮貝即係江瑤柱，又係大大碟，無論江瑤柱定係娃娃菜，都非常足料，湯又係好濃魚鮮味．卒之飽到食剩半碟娃娃菜要打包走．睇到差唔多枱枱都叫籠仔蒸飯同蒸扇貝（好大隻，25蚊隻），下次必定要嗌多幾個人