Fûhn Express (已結業)

放工要去太子，約左女友係旺角火車站等。佢未黎到就覺得有D肚餓…所以等佢到左就捉佢係附近食左野先。佢話而家天氣熱，唔想周街走，就入左MOKO 搵食。最後都係上左去food court，而家呢間都幾多選擇，最驚喜係呢度原來有Fuhn! 以快餐既越南粉麵黎講呢間都幾有水準。而且係food court價錢好親民。就分別叫左一個撈檬同一個湯河。女友揀左特式雞絲湯河，呢個既餸方面都好多野，除左有雞絲之外，佢仲有鵪鶉蛋同埋雞肉丸，唔錯! 女友話個湯底好飲，平時佢好少飲湯的，怕味精重，但呢個用返雞湯好清好香! 湯河厚度適中，而且餸菜份量都好多，雞絲又唔會好um，而且個雞肉丸都好有驚喜，第一口有D似貢丸，之後再咬發現個雞味都幾香，好彈牙! 原來我地兩碗湯粉同撈檬都有越式春卷送，唔怪得多左一碟小食，仲以為畀多左，哈哈。呢個春卷都炸得好香口，個網面好鬆脆，而且佢唔算好大條，反而容易食，食落口又唔會太油。我既香茅豬扒撈檬真係有水準，配料齊全，份量十足，最緊要個豬扒好香又鬆脆，肉又冇雪味! 佢個撈檬汁酸甜度剛好!