麵佬到 (已結業)

我自己上openrice到睇附近有咩好食，點知俾我發現咗依間新開張嘅馬來西亞餐廳，但十分難搵個入口，搵咗好耐先搵到喺後巷入。入到去得2個人，聽到佢話仲係試業緊，所以唔多客但都比我嗌咗最後一碗喇沙。佢哋餐廳好細心，特登整咗佢哋餐廳專用嘅酒精消毒液派俾客人，仲要係有得掛上袋嘅款。同埋擔心客人食喇沙會整污糟，所以會有張餐巾連埋夾仔俾客人。成碗喇沙好足料，亦飲得出個湯底煲咗好耐好濃味。面頭啲乾蒜勁足同埋好香，至於啲辣醬佢就話想食辣先點 (雖然已經喺隻蛋上面其實我都唔知可以點樣點啲唔點啲)。啲魚蛋勁彈牙同埋好大粒。啲蝦都好新鮮。成碗嘅口感都好豐富好滿足，不過食完好口渴，好彩佢個餐有得配嘢飲。個嘢飲好似係檸檬橙，都好新鮮。