Gees Restaurant & Bar (已結業)

相識十多年嘅好友生日，知佢鍾意食西餐，一於搵間有格調嘅餐廳同佢慶祝生日。餐廳分上、下兩層，地下係Bar，樓上係餐廳。餐廳環境高雅，有情調又帶點浪漫感，適合我哋靜靜地食飯傾心事。菜式選擇唔算好多，但每道菜設計有心思，感覺好吸引。餐前附送嘅麵包新鮮鬆軟，幾好食。頭盤係蜜糖燒塔斯曼尼亞三文魚，賣相十分吸引。三文魚表面略為燒香，塗上蜜糖，蜜味加上三文魚油脂香味，兩者配合得宜。而鋪底嘅無花果香甜有果香，好清新。法國鴨肉拼盤包含鴨肉批、鴨腿同埋鴨胸肉，3款都各有特式。鴨肉批貌似午餐肉，口感較為結實，而中間夾雜鴨肝，好甘香，配上嫰綠嘅菠菜苖，可以平衡番油膩感。鴨腿表皮煎得香脆，但肉質卻出奇地軟稔，伴有小薯粒，唔錯。3款鴨肉中，我個人偏愛鴨胸肉。鴨胸肉呈粉紅色，肉質煙韌，而大傘菇菇味香濃多汁，兩者味道好夾。麵條有韌度，蕃茄醬汁酸甜開胃，味道唔錯。但蝦干味道同質感唔太突出，而且醬汁略嫌較少。小結：食物有質素，侍應服務態好，環境舒適，令人放鬆，值得再光顧。