早安越南 (已結業)

之前經過已經被店舖嘅格調吸引，門面唔算大，但好清楚見到裝修帶點復古，紅藍色作主調，啲公仔又好得意。越南冷盤，有札肉、燻蹄、牛𦟌同無骨鳳爪。牛𦟌好入味，甜甜地。燻蹄唔錯，不過每片都有粒類似黑胡椒嘅香料，一咬開就好大陣香料味。無骨鳳爪同札肉就不過不失。生牛肉湯河牛肉片唔肥，不過可能浸得耐，有啲韌。配有大量芫茜同䓤，湯幾清甜。香茅雞扒撈檬好多花生碎同炸脆粒，雞扒好大塊，連皮半煎炸，邊位好香口，係有啲硬，但肉中間係滑嫩juicy嘅。不過成個撈埋就有啲油膩另外叫左兩杯特飲熱香茅蘆薈呢個好好飲呀，香茅味唔算太濃，剛剛好，好似有少少蜜糖味，幾多蘆薈粒。一飲係有陣清香，就算係熱飲，飲落去都覺得好舒服，有少少解膩作用。三色冰呢個尚可，配料甜甜地，剩餘嘅就係一般嘅椰汁。整體幾好，食物調味都唔太重手，又幾抵食