城市匯 (已結業)

放工後約咗朋友喺尖沙咀行街，行到TheOne附近開始肚餓，就睇下附近有咩食。喺Openrice search下見到呢間餐廳好似幾好，就去試下。入到去裝修環境確實唔錯，餐廳分咗室內室外兩part ，室內空間唔算大，而室外就鋪晒草皮可以飲下酒咁都幾chill。至於野食方面，先送上麵包，麵包用個鐵盒裝住幾特別，暖暖地唔會太硬。主菜我揀咗慢煮西班牙黑毛豬脊肉，賣相唔錯，本身都驚豬會好靭，但切落好淋，再加上豬脊肉上面加咗層麵包糠，脆脆地幾好食。呢個真心推介。而我朋友就揀咗海鱸魚柳配牛油果醬。朋友覺得魚柳味道啱啱好，但我食落就覺得咸咗少少。而魚柳下面就鋪咗炸過嘅羽衣甘藍墊底，鹹鹹地幾正。整體黎講環境嘢食都唔錯，但如果食物份量可以大啲就更好。下次搵日Happy Hour嚟飲嘢先。