Lagom Kaffe (已結業)

去附近探朋友問佢有咩推介餐廳，佢就介紹左呢間。雖然有黎開呢一頭但真係唔知呢度一樓竟然開左間咁靚既餐廳。入到去就見到好大既西式水吧位同露天座位位置，好可惜今晚太熱，如果唔係一定會坐出面好好嘆吓。一坐低唔理三七廿一叫左飲品先，實在太熱。見有draft beer真係好興奮，點知一黎到...嘩勁大杯！叫完野食，好快就黎左餐前麵包，估唔到係正宗歐式麵包再配埋香草牛油，有香草同果實既味道因為我同Fd都唔太餓，只係叫左一個主菜：台灣風味牛肉千層麵。叫果陣真係唔知台灣風味會係點，諗住試一試啦。黎到熱辣辣似係岩岩焗起，仲好香，但麵諗唔到係咩味，直到試左啖先知，原來係台灣牛肉麵既口味，好香既花椒，加埋蕃茄既甜味同微微既辣，真心好食！唔肚餓都差啲自己食左成個。甜品就叫左道焙茶芝士蛋糕同Fd一齊share，雖然唔大但都好夠，本身個蛋糕唔係太甜，加埋個焙茶醬就岩岩好，個賣相冇想像中咁靚但係好食既。心滿意足既一餐，同Fd 吹水食飯又一晚。