百味堂 (已結業)

呢日行街行希慎廣場，見到中庭位置又換左新pop-up store，而且有好多人圍住個store等，埋去睇先知原來係韓國品牌既雪糕-「百味堂」！呢個希慎期間限定店都幾金光閃閃下，但除左金色牌面外，仲用上木系裝潢，不失時下流行既文青風，難怪經過呢度既途人都會望下。其實之前係尖沙咀已經食過佢地既純牛奶雪糕，無留意原來佢地有出咁多款蛋糕同麵包，當日見到有磅蛋糕同雪芳蛋糕賣，不過我最想食既牛奶忌廉包就賣哂喇。但天氣太熱，都照樣買左雪糕食！濟州抹茶黑朱古力牛奶雪糕 ($82)抹茶同黑朱古力兩樣都係比較少甜既醬，兩者聽起黎好似唔太夾，但撈埋牛奶雪糕食，突出返甜味後，就好似食緊抹茶朱古力。不過濟州抹茶既青茶味比起日式抹茶既較為淡，口味較大眾化吧。意大利芝士咖啡雪糕 ($78)比起抹茶雪糕更濃味係呢杯落左意式濃縮咖啡同Mascarpone Cheese既Affogato！咖啡好有烘焙香，濃味順喉又無渣。老實講，我覺得佢地個咖啡比起佢地既主打牛奶雪糕更有驚喜！總結黎講，百味堂的雪糕冰感較重，始終可能有機牛奶的脂肪量唔高，口感唔夠濃稠厚實。反而咖啡可以一試！