黑木亭居酒屋 (清風街) (已結業)

上年同朋友食過尖沙咀黑木亭嘅分店，個啤酒杯冷麵真係令我印象深刻。原來總店就喺天后清得街，一直近在咫尺都冇留意！今日即同屋企人去食個2.30pm late lunch 先！ 《 青紅蘋果是蟹子沙律 💲98 》先嚟一個清新健康嘅沙律開開胃，蘋果甜唔會好酸，仲有蟹柳肉同蟹子，加上沙律醬惹味。《火炙左口魚邊卷 💲148 》一碟有6卷。左口魚邊火炙過有油香，中間卷有甜蛋同青瓜，層部就放有三文魚籽同魚籽帶出微微咸鮮香，整體味道夠，我無蘸醬都覺得夠味～《 流水熔岩蛋三文魚飯 💲69 》熟三文魚好有脂香又嫩滑，啲飯吸咗啲魚脂好香，加埋流水熔岩蛋同啲沙律醬，香滑又提味。跟麵豉湯及漬物。《 黑松露忌廉湯烏冬配吉列豬扒 💲98 》個吉列豬扒有驚喜，吉列皮香脆唔油又夠薄，豬扒肉好爽嫩又有肉汁，炸得火喉好好。黑松露忌廉湯底幾香濃，烏冬彈牙掛湯好味。《 北海道士多啤梨牛乳乳酸 💲28 》酸酸甜甜好減膩，仲有士多啤梨乾添。《 蜜桃烏龍紅茶 💲38 》熊仔冰好可愛～整體冰凍微甜，十分解渴，正適合開始熱嘅天氣。