2DP (已結業)

依間舖頭經過好多次，都好想試下，今次終於試到啦！唔係失望反而有驚喜。以我所知依間素食餐廳成日都推出唔同嘅新野，價錢嚟講食晚餐會化算啲。反而午餐就覺得貴咗少少。泡菜煙肉卡邦尼意粉：有驚喜，因為個汁調敎得十分適中，有濃濃嘅卡邦尼味道。泡菜汁亦十分突出，發揮到開胃作用，唔會令人食完覺得好漏嘅感覺。唯獨以為有泡菜係入面，同埋佢哋用咗係我唔中意嘅扁意粉。總括意粉大力吸收到泡菜同卡邦尼汁，所以扁意粉食落無咁介意。蕃茄水牛芝士薄餅：驚喜在於用「薄餅」。薄餅都整得好鬆脆，水牛芝士完全發揮到主角嘅作用，十分有水準。至於黑松露薯條及沙嗲素雞串就普通咗啲。炸物來説始終唔係佢哋強項。薯條就太過乾身，沙嗲雞串比較油。總括而言，主菜係唔錯，小食就普通啲，未試過佢哋嘅飲品。