芽莊越式料理 (海港城)

營業中

休息中

芽莊係一間裝修精緻嘅越南餐廳。樓底夠高而且有一邊全部係大玻璃窗，維港景色盡收眼簾。如果去食晚餐的話，對住無敵大海景，真係令食飯嘅氣氛大大提升。- 軟殼蟹青木瓜沙律🥗（$108）有一整隻軟殼蟹，外表炸得金黃鬆脆，內裹保持到鮮甜多汁。青木瓜沙律材料豐富，有青木瓜、紅蘿蔔、紫洋蔥、花生、香草同一片蝦片。可惜蝦片有啲硬，不過唔影響整個沙律嘅味道。調味醬汁酸辣惹味，非常開胃。不過唔食得太辣嘅朋友要留意，呢個沙律我覺得屬於中辣程度🌶- 越式炸春卷 🥢 （$90）春卷外皮有少許硬，餡料唔算好多，味道中規中矩。反而我喜歡旁邊有大量生菜同青瓜，可以夾住春卷一齊食，減低油炸嘅肥膩，仲唔會太熱氣。- 燒豬扒撈檬 🐷 （$88）豬扒富有香茅醃料嘅味道，炸得甘香。檬粉軟硬適中，無黏埋一嚿嚿。比起湯河粉，我更喜歡檬粉。因為可以加入特整嘅魚露，酸酸甜甜，而且仲有各款蔬菜絲，口感豐富。