御苑皇宴 (已結業)

未夠11點嚟到飲茶，人唔多，天氣好似好好，喺個窗見到局部地區性驟雨，醫飽個肚至算。第一碟嚟嘅係北姑雞煲仔飯，雞件已經去曬皮，又腍又滑，冬菇香，夠厚身，飯唔會太硬，係我鍾意食嘅質地。煲仔大概可以裝到四碗，幾抵食喎。芋角，裏邊極度唔夠芋頭，啲餡又嘛嘛哋，下次唔會再點。雜菌魚肚，魚肚吸曬啲汁，又夠硬厚身，彈牙，正粉果好味，皮又唔會太薄又唔太厚，都算餡料十足。叉燒包裏面個餡唔夠汁，兼且個皮太厚，雖然要食得淡口至健康，但我唔鍾意食佢呢隻。鹹水角比芋角好食，雖然餡料份量一般，勝在外皮煙韌，脆脆哋，有味道。胡椒鹹菜魚肚，不過不失，多幾條鹹菜更好。