熊貓甜品屋 (已結業)

平時好少係佐敦覓食， 呢晚老公帶我去左附近食火鍋， 食完見到斜對面有間好得意的甜品屋， 一於黎個飯後甜品啦! 行到甜品屋即刻俾門口果隻超級巨型的熊貓吸引住!!!原來呢間甜品屋係以熊貓為主題~行到入面周圍都可以見到熊貓的蹤影，佈置好用心，就連食用餐具全部都係熊貓造型!! 呢度的甜品有傳統的中式，亦有西式創意甜品，款式選擇都幾多，仲有榴槤系列的甜品添!店員又好親切~ <椰皇燉蛋布丁> 整個椰子上，正中央係香滑的燉蛋布丁 蛋同奶味都好香濃~ 下面的係透明水晶燉椰皇汁糕， 入口散發濃濃的椰青汁香味~ 再配上椰皇內清甜的的椰汁，口感層感多，整個配合非常好，令人有驚喜 老公就點左他最愛的芒果系列<芒果三重奏> 包括有芒果拿破崙、芒果班戟和芒果雪糕 芒果拿破崙香脆鬆化，果肉份量多，配埋幼滑的吉士， 味道岩岩好，唔伯太甜~ 最重要芒果肉新鮮香甜! 班戟都唔錯，皮夠薄， 如果甜度多返少少，加多少少芒果肉會更完美!芒果雪糕軟滑，芒果味濃!