影片
更多
2025-02-15
0 瀏覽
大開眼界。本來成個情人節好開心，有花收有驚喜有禮物。點知就係呢一年冇book到食自助餐，諗住因為年年食自助餐好悶，所以老公就幫我book咗呢一間餐廳諗住慶祝情人節。點知成個情人節就咁俾呢間餐廳搞到所有氣氛同心情都冇晒。我哋約咗夜晚8:45入座，去到餐廳門口已經有一對情侶喺度等緊，我哋入去同侍應講我哋約咗8:45 ，侍應叫我哋喺出面等一等，諗住應該好快可以入，點知等到九點，都完全未有可以入去嘅感覺，出面等位嘅地方好細，有啲侷促，因為仲帶住小朋友，所以老公在入去問多次幾時可以入座，強調我哋係約咗8:45 ，侍應叫我哋再等一等，好快就可以入座。我哋再等多15分鐘，終於可以入座，但最精彩嘅而家先上演。入到去之後，侍應就同我哋講話枱面有兩支水，如果開嘅話就要加$38一支，我老公問佢可唔可以俾兩杯暖水，女侍應同我哋講，我哋冇水提供，如果要嘅話就要開水，要加錢，跟住佢就話：「我免費開俾你哋啦，唔好意思要你哋等咁耐，不過你哋唔好嘈，唔好咁大聲。」我哋一頭霧水，不過諗住算啦都見到佢哋有誠意，但是大時大節應該都係比較忙，應該安排上有少小失誤啫，諗住都開開心心食埋餐飯就算。我哋9:15入座，等咗15分鐘，都
本來成個情人節好開心，有花收有驚喜有禮物。
點知就係呢一年冇book到食自助餐，諗住因為年年食自助餐好悶，所以老公就幫我book咗呢一間餐廳諗住慶祝情人節。
點知成個情人節就咁俾呢間餐廳搞到所有氣氛同心情都冇晒。
我哋約咗夜晚8:45入座，去到餐廳門口已經有一對情侶喺度等緊，我哋入去同侍應講我哋約咗8:45 ，侍應叫我哋喺出面等一等，諗住應該好快可以入，點知等到九點，都完全未有可以入去嘅感覺，出面等位嘅地方好細，有啲侷促，因為仲帶住小朋友，所以老公在入去問多次幾時可以入座，強調我哋係約咗8:45 ，侍應叫我哋再等一等，好快就可以入座。我哋再等多15分鐘，終於可以入座，但最精彩嘅而家先上演。
入到去之後，侍應就同我哋講話枱面有兩支水，如果開嘅話就要加$38一支，我老公問佢可唔可以俾兩杯暖水，女侍應同我哋講，我哋冇水提供，如果要嘅話就要開水，要加錢，跟住佢就話：「我免費開俾你哋啦，唔好意思要你哋等咁耐，不過你哋唔好嘈，唔好咁大聲。」我哋一頭霧水，不過諗住算啦都見到佢哋有誠意，但是大時大節應該都係比較忙，應該安排上有少小失誤啫，諗住都開開心心食埋餐飯就算。
我哋9:15入座，等咗15分鐘，都未見有任何嘅食物上枱，因為小朋友都已經有啲攰同肚餓，所以我哋就再次催促一下幾時可以有食物上枱，侍應都係一貫地叫我哋等一等，話好快好快，喺中途我哋都聽到隔籬枱有一家四口話已經等咗半個鐘頭但係都仲係未有嘢食，我哋已經心知不妙，最後9:45先上第一個頭盤（總共有四個），因為頭盤都係比較簡單嘅沙律菜，我哋其實幾啖就食完，跟住就等第二個頭盤，中途我哋都有要求侍應不如上咗個湯先，可以俾小朋友飲住等，侍應話冇問題，但係都係冇咗件事，最後佢嗰四個頭盤，每一道頭盤與頭盤之間都係相隔最少15至20分鐘先有下一道菜上枱，所以淨係食晒四個頭盤已經10:45 。
因為小朋友已經好攰，又肚餓，再加埋我本身自己個胃都已經唔係好舒服，於是同老公講不如離開，我哋已經冇辦法再等咁耐，不如真係出去食個麥當勞就算數，聽日再補慶祝。與此同時個湯終於上咗，我就同小朋友飲埋個湯，其實當時已經夜晚11點。
老實講我真係冇諗過食一餐飯可以11點都未食到主菜，我同老公講咗一句話我去埋洗手間我哋就離開啦，我真係冇辦法再等落去，點知去完洗手間之後，其中一個主菜就上咗嚟，咁都冇辦法啦唯有食埋先，下一個主菜就11:10左右上埋，老公就話食埋2個主菜我哋就離開，唔再等佢個甜品同飲餐茶，嗰陣我哋已經係餓到有小小狼吞虎嚥，但係最後食唔晒因為個三文魚係鹹到入唔到口。
最後我哋食完主菜之後甜品都已經冇晒心情再食就已經埋單離開咗，盛惠$1745。
我哋走嘅時候大概係11:15分，如果真係等埋甜品同餐茶，可能真係要食到12點。
今次真係一個極之極之極之差嘅體驗，我完全唔明白點解一間餐廳可以做到咁差，明知廚房細，完全冇辦法handle到咁多客人，就唔好接咁多客。我哋完全係食到發晒脾氣，而餐廳完全冇諗過可以點樣安撫客人，冇諗過情人節會搞到心情咁差完全都係因為呢間嘢，食完之後已經係又攰又勞氣，小朋友係扭晒計。
總括而言，呢間嘢喺人生中不會再去，冇可能有下次，垃圾之中嘅垃圾。
張貼