菠蘿仔食堂 (沙田站) (已結業)

今日星期六，去完做FACIAL返入沙田時因未食午飯，所以感覺好肚餓，見到呢間店，心諗成日想試下但一直沒機會，今日終於可以一試滋味了。佢位於火車站入口附近既店舖，地方唔大，專做外賣，見佢水牌的食物都算幾多款，後來我揀左其中一個波士餐，入面有鮮忌廉菠蘿包，瑞士雞髀，同一杯熱飲，但我見有啲特別飲品，但要額外加錢，後來我加左$14要左杯柚子薄荷鮮檸茶。忌廉菠蘿包入面有吉士忌廉，都算滑的，菠蘿包入面竟然有真菠蘿粒，菠蘿都算幾甜，唔係罐頭菠蘿黎，真係名符其實的菠蘿包，菠蘿包買返屋企都冇變腍，面頭仲係好脆，個包都唔係空心麵包，都算有質感既麵包。柚子薄荷鮮檸茶係一個幾新鮮配搭，檸茶有柚子味，柚子有薄荷味，薄荷有檸檬味，係味覺既享受！瑞士雞髀做得唔錯，味道唔會好鹹，亦都食到瑞士汁的甜味，雞髀都唔係好細隻，肉質唔鞋。唔錯！整體都算唔錯，價錢係貴左少少，但耐唔耐食一次都幾好！