一茗堂 (南山商場) (已結業)

以前中學午餐都會嚟南山村食，好耐冇嚟過呢一頭，咁啱今日過嚟呢邊搵朋友，見到開咗間新嘅餐廳，而且環境特別出眾，因為本身呢邊多數都係小店，但呢間佈置係比較新潮啲，所以我同朋友二人決定食呢間。裝修真係幾小清新，又帶啲西式嘅風格，座位之間闊落，有空間感坐得都好舒服。我同朋友二人各嗌左一個午市套餐，贈送餐湯或沙律。而當日嘅餐湯係手打番茄湯，好濃嘅蕃茄味，顏色偏橙，同一般嘅西餐廳飲到嘅真係幾唔同，蕃茄味比較真，都唔錯。《黑松露蘆筍龍利魚卷配白飯蔬菜香草忌廉汁》$68第一次見蘆筍龍利魚卷呢一個菜式，本身鍾意食魚同埋蘆筍既我，覺得兩者配合一起都唔錯，味道比較清淡少少，點汁味道就會更突出。黑松露略嫌味道唔夠出，如果多番少少就更好，整體一般。《意式蒜香辣椒雞柳扁意粉》$48蒜味香濃，而且雞柳唔會好乾好孩，食起嚟都算幾滑，而且扁意粉口感好好唔會過林，都幾彈牙，推薦！追加小食《明太子雞翼》$33好鍾意食明太子嘅嘢，呢個雞翼咬開超多明太子，好滿足！最後仲有兩杯美式咖啡，即磨夠晒香濃，亦都睇得出有誠意。