棋哥燒鵝 (已結業)

難得放假去揾男朋友食lunch，就叫我帶佢去平時同同事食飯嘅食堂試下啦！呢間棋哥燒鵝地點都幾就腳，一入去感覺比平時嘅燒味舖形象年輕...d poster都幾有趣🤣🤣首先叫咗一份我地最鍾意嘅化皮乳豬例牌($168)。烤乳豬排列整齊，乳豬望落去色澤均勻，豬皮皮光油亮，金黃酥脆，可見師傅控制火喉功夫到家。在喺側邊望一望，一層肥肉夾住一層瘦肉咁樣，肥瘦適中，叫人口水直流。咬落豬皮入口酥化，最重要嘅係肉質滑嫩可口，而且乳豬嘅醃料啱啱好，唔會遮掩左豬肉味，係我是日嘅最愛。另外我哋仲叫咗一份白切雞同燒腩仔雙拼($108)，雖然呢度嘅燒味係凍住上，但一樣好好味。白切雞口感嫩滑，雞皮好香好滑溜，脂肪比例啱啱好，雞嘅鮮味配上蔥油，好味！脆皮燒腩仔有明顯分隔，由頂層脆皮、肥膏、嫩肉、到最底層的瘦肉，層層分明。每塊燒腩既外表都烤得金黃酥脆，味道鹹香入味。