聚潮潮汕地道美食

營業中

休息中

路經北角，想食碗潮式豬雜/魚蛋粉，上openrice 搜尋，見到呢間，又未收鋪，入去試吓。一向食潮式豬雜粉麵，會諗起西營盤正街嗰間，但而家晚上8點幾，冇理由而家走去西營盤，咁就試吓呢間啦，諗住填包個肚就算。舖內為典型港式粉麵舖擺設，以四人枱為主，不算闊落，也不為擠迫。桌上有魚露、二款潮式辣油及古月粉等，達基本潮式粉店要求，店面女侍應態度友善，點了一碗豬心+魚蛋+豬肚丸米粉及凍檸茶，另加通菜一碟，5分鐘上齊，很好！豬心有驚喜，豬肚丸有肉汁，魚蛋唔錯，湯底不過咸，通菜比坊間一般餐廳大碟，全部合共60多元，比起連鎖式麵店高質。老闆會問吓顧客，食物是否合乎口味，呢種小店親切的態度，近年已少見。另一枱食客，可能同老闆熟悉，要求老闆提供hidden menu(代購靚海鮮，並以潮式方法製作)，老闆同街坊相討烹調方式，可見老闆對煮食的熱情，亦得街坊信任。下次會再幫襯，除了因為啱口味的潮式麵食，亦為了老闆對食物的熱情。