貴記荳品 (已結業)

真係由細飲到大，睇住煮嘢個肥仔變咗肥佬，夥記變晒老夥記。小學放學行過習慣飲返杯豆漿，當時仲係一蚊杯，部機上面貼住張紙「有錢飲杯先」，我哋幫襯時成日都接多句「冇錢係咁先」。啲豆漿凍到一飲個頭都痛埋，但係細個覺得好正。咁多年嚟親都係食鍋貼、豬皮、豆腐，加杯豆漿，都係十幾蚊找數。鍋貼啲皮厚到加埋多過肉，但係我自己就鍾意佢啲滷水汁。仲有，豆瓣醬一定要多。講開豆瓣醬，廿幾年後都仲係用嗰隻膠杯裝住，同埋嗰隻隔離麥當勞攞返嚟嘅膠匙。真係見到都feel like home。老實講，呢啲舖除咗平之外，真係食感情。要乾淨企理、服務好，咁就咪鬼幫襯呢啲街坊舖啦。