潮興海鮮酒家

營業中

休息中

今天約埋一班老友食團年飯，由於大部分朋友都係住係西區果邊，於是我地就選擇左係荃灣三陂坊嘅潮興食飯了。坐低就黎4碟酸蘿蔔同花生之後先知要計錢的。跟住就點菜了。首先係烏頭，個人感覺麻麻地，魚係無泥味嘅，但係鹽焗味道唔係好出。跟住就到鹵水大拼了，這個都是穩定的出品之一，特別欣賞紅腸及豬耳。椒鹽鮮魷，小炒店必點項目，略為失色，未去到唔好食嘅，係椒鹽味差少少同埋個皮厚左少少。豬紅係最欣賞嘅菜式之一，份量多多，韭菜做底，味道非常入味。油鹽水浸蜆，份量充足，味道好味，蜆肉大大粒，推介。蠔餅，聽講都係必食系列之一，蠔餅份量非常大，而且啖啖蠔肉，味道可以，而且都好香脆。最後就係豉油王炒麵，必點項目，非常有鑊氣，配料又充足，聽說豉油王炒麵是絕對顯示師傅技術菜式之一，這個絕對推介。我們都好滿足，飲飽食醉，期待下個飯局。