真味鮮廚

營業中

休息中

入去坐低先發現係海港集團旗下。不過侍應帶咗去近門口嗰幾列間哂辧公室partition咁高、仲要最尾嘅邊位卡座，私隱度夠又減噪音，認真抵讚，所以成餐打邊爐都食得輕輕鬆鬆唔駛左顧右盼：唔駛顧慮椅背有路人要郁凳就位；唔駛顧盧卡位背面另一卡位大力挨落背板嘅碰撞滋擾；亦唔駛慎防有小孩企上卡座伸頭嚟連環同你哈囉幾十次而你唔應佢有機會俾人放上網公審話你蝦細路冇禮貌……因為塊間隔板超高之餘亦夠實淨。唯一係另一側門，會間中有輪椅客進出而交換舖外股熱氣，且呢邊空調亦未夠威力。雖然坐到發配邊疆，但侍應到時到候過嚟招呼，手腳俐落。打邊邊嚟講有兩粒半鐘食，足夠。另一意外係啲海鮮好捱得，即係好鱻。碟串蝦嚟到俾竹簽插住一般都死咗八九成，啲腳居然可以45分鐘後都仲郁緊；沙白蜆又係放咗成個鐘都伸啲肉出嚟啜碟底啲水氹。台灣鴨血係冇加麻辣，如要有呢個效果，建議出去大廳醬料吧，搵碗貌似南瓜蓉嘅醬，實則係海南島特產嘅黃燈籠椒醬，俾平時血紅嘅辣椒醬更辣到嘔……我就係一時中伏，以為係溫和嘅南瓜蓉，結果點少少都辣到飛起！成粒話梅皺忟忟咁款嘅魚腐估唔到幾好食，烚耐咗繼續皺皮但冇淡味。