天下豬肚雞椰子雞專門店

營業中

休息中

今日收工唔係太夜，喺佐敦搵嘢食，呢間舖頭好似唔係開咗好耐，店名同佢哋嘅套餐好似都幾吸引，好想去試下。入到舖頭入面原來都幾大，多數都係大枱畀一大班朋友一齊食飯，兩至四個人呢就只得幾座卡位。今次兩個人食叫咗一個二人套餐，好抵食，而且好好味。首先雞煲，可以揀豬肚雞或者椰子雞，我哋揀咗椰子雞，聽講佢哋揀定雞都係一啲果園走地雞，所以特別嫩滑， 再加上佢呢個電磁爐都幾特別，有埋計時器，啱啱好五分鐘，唔會太熟太老，椰子湯非常清香，暖粒粒，好好味。跟住可以揀一份牛肉或者豬肉，我哋揀咗霜降牛肉，肉質唔錯，另外有份菜，仲有個煲仔飯，有幾個選擇，天氣唔係好凍，唔係好想食臘味，所以就揀咗一個窩蛋牛肉飯，呢個窩蛋牛肉飯好有驚喜，因為佢唔係用一般嘅牛肉餅，而係真係用滑牛，朋友原本唔係好鍾意食煲仔飯，佢都話正，成個餐連埋加一醬芥 500 元有找，當然佢另外仲有啲 Upgrade 嘅套餐下次再嚟試。