Cafe Paradise (東寶大廈) (已結業)

呢日係北角上完堂經過左呢間Cafe Paradise，之前都有經過佢哋太子分店，就試下啦。去到5:30pm己經轉左晚市餐牌，都係有set dinner 選擇嘅;是日餐湯係牛肝菌磨菇湯，飲落比較厚身，都食到有一粒粒碎磨菇嘅，至於沙律就應該係整定係雪櫃拎岀黎，因為飲完個湯先食己經見到個碗有冷水氣，不過份量都算慷慨。而且杯凍飲都算大杯！主菜可以五揀一，想試下佢個黑莓蜜糖汁所以叫左個烤美國豬鞍。等咗20分鐘終於上菜啦，個賣相都幾靚，豬鞍冇乜筋好淋好容易就切到，而且食落去都幾多汁，本身個肉係醃咗嘅，所以唔使點佢個汁都已經夠味。反而個黑妹蜜糖汁就唔係太食到黑妹味，我覺得好似宜家傢俬平時食肉丸嗰一個莓醬咁樣，不過配埋豬都幾夾。甜品可以選擇加錢去食佢哋嘅芝士蛋糕，或者自家出品嘅窩夫，不過之前食咗咁多嘢我都係選擇是日甜品算啦，就係芒果啫喱。本身仲諗住西餐廳會係一件細細地嘅蛋糕仔，或者係雪糕，冇諗過會係喺超級市場買到嘅啫喱粉整出嚟嘅啫喱…. 整體來講，價錢同食物質素都成正比嘅，雖然甜品失色咗少少，但係都想讚一讚餐廳本身嘅班底，好後生，做嘢有效率而且亦都會講解今日嘅餐牌同埋食物。