小籠家族 (已結業)

本身諗住食拉麵，行到附近見到呢間上海野好似又唔錯🤣晚市都唔算多人就入去試下😎一坐低店員就斟左兩杯蕎麥茶，每位茶芥$3，不過個杯有啲怪味，無咩點飲😥一黎叫左個招牌麻辣豬手 ($68)，麻香惹味，辣味唔會太over，唔會過濃郁，豬手唔肥膩，又有咬口😋而呢度除左一般既小籠包，仲有黑松露小籠包同蟹粉小籠包，不過第一次食，試左個最基本既味道先，呢個家族小籠包 4 件($38)，黎到要趁熱食，雖然係熱，但未至於熱到食唔到，一啖一粒放入口啱啱好👍🏼個皮好薄😋一唔小心夾爛個皮啲湯汁就會流晒出黎。所以我比較鐘意點少少醋，再一啖放入口，等啲湯汁喺個口度爆開，連埋啲肉一齊食🥰上海炒年糕 ($72)份量幾多，而且感覺唔係用左好多油去炒，入味得黎唔會好鹹，年糕煙韌又有咬口😗仲有啲椰菜絲、肉絲同少量菇，成碟清晒😆上海酸辣湯 一鍋 ($78)夠酸夠香辣，入面有冬菇絲、肉絲同筍絲，兩人叫一鍋，每人大概都飲到兩碗！總括黎講，如果唔鐘意食濃味野既話，呢間上海菜都幾啱食，以清淡口味為主，唔啱重口味既人。