泰嘟嘟

營業中

休息中

大角咀一向都多餐廳，間唔中都會黎呢區搵食，經過泰嘟嘟見到裝修幾有心思，牆身有tuk tuk塗鴉，又掛左泰國足球球衣，泰拳服裝。卡位又整到好似tuk tuk，成間店都好有泰國感覺，幾有特色。食物方面選擇好多，選擇困難症又出現，樣樣都想食，但2個人食唔到好多。最後揀左3款食物，分量都幾多，好滿足，整體性價比唔錯。咖喱麵包軟殼蟹 ($188)一上枱已經覺得好吸引，好大個多士盒，鋪滿咖喱汁，同餐牌上圖片一樣咁靚，絕對唔係圖片只供參考。軟殼蟹大大件，炸得好香脆。咖喱汁濃厚，椰香好重，係唔辣嘅咖喱，用黎點麵包食非常適合。當日見到好多枱客人都有點，呢道菜真係必點菜式，推介! 炭燒豬頸肉($78)豬頸肉上枱會有一個爐仔興住熱住，唔怕放得耐會凍晒，食都最後都仲係熱，非常細心。豬頸肉燒到焦香，口感爽脆有彈性，唔會醃到過分軟，配上醬汁，酸酸辣辣，非常惹味。飛天通菜($68)通菜分量幾多，蒜蓉加辣椒炒，炒得好惹味，香辣香辣，好食！芒果芝士沙冰($32)食泰菜唔少得芒果，沙冰芒果味濃，甜度適中，芝士奶蓋幼滑，面頭仲加左芒果果肉，感覺清新。