越式越好味 (已結業)

今日要去深水埗買手作材料，見時間尚早，先去附近吃頓 early lunch。大熱天時，冇乜胃口，想食得清淡少少。喺寶血醫院斜對面見到有間越南餐廳，走近細看，門面光鮮，而且店外還擺放了不少小盆栽，風格清新舒服，加上見到餐牌嘅價錢都幾經濟，一於試下。餐廳由越南廚師主理，主打一系列正宗越南菜式，當中包括有越式飯類、湯河粉、特色撈檬、濱海、春卷及米紙卷等。我哋點咗香葉豬肉卷、米紙卷同一客撈檬。軟殼蟹米紙卷 ($55) 賣相好吸引，以煙韌嘅米紙皮包裹住炸到脆卜卜嘅軟殼蟹、自家製酸甘筍同青瓜絲等，食落口感好 fresh，同爽脆的生菜配合得天衣無縫，有助消暑。第一次食呢款香葉豬肉卷 ($56)，好特別，賣相烏卒卒。外層微脆，內裡又不會太乾，入口啖啖肉香，加上中間仲混入咗少少紅蘿蔔粒，帶來多重口感。另外呢碗越式扎肉撈檬 ($49)  水準亦甚佳，扎肉爽滑有彈性，入口鮮味十足。檬粉粗身Q彈，爽口帶米香。加入碌冧，味道酸酸甜甜，帶魚露嘅鹹鮮，好開胃，與甘筍、青瓜絲、生菜絲同花生碎等拌勻一齊食，清爽又唔膩口，正！點河粉、撈檬或飯類等，會跟熱飲一杯，另外入座時，店員亦會為客人送上清香嘅班蘭茶，服務挺貼心。