寶哥味館 (放題店) (已結業)

首先要讚一讚個伙計哥哥，我有D懷疑佢係呢間野既老闆之一，鬼咁識做生意，服務又好好，仲氹得我地鬼死咁開心！第二樣要讚就係調味區，真係好多野俾人揀，真係應有盡有，連原隻生雞蛋都有，真係有D喜出望外，醬料費都只係收每位$8，非常合理！除左醬料之外都無其他費用收，連湯底都唔洗另外收費．個伙計哥哥一開始都解釋得好清楚俾我地聽．食物方面都幾新鮮，款式都係大路野，不過就refill得慢左少少，有幾款熟食，味道都可以，至於甜品方面，唔講得好食，但係幾討好，但係個自助食物區唔係咁集中，分開左幾度，唔留意都唔知有幾度地方攞野食．飲品都係任飲，不過係order既，唔係自己攞，本來想試個酸梅湯，點知好快就賣晒啦，好彩都仲有夏枯草，都唔太甜，略縑唔夠濃，仲有汽水供應，都係任飲，啤酒就唔包．至於座位方面，個燒烤位置同個鍋又真係細左少少，唔係好夠地方放野食，同埋係用碟食，唔係幾方便，好易漏汁，不過可以自己出去攞碗同匙，咁就好好多．總括黎講都幾唔錯，一定會再去！