巷仔見麵館 (軒尼詩大廈) (已結業)

朋友介紹我巷仔見麵館嘅二人套餐好抵食，而且點心都唔錯。餐廳裝潢充滿經典港式大排檔風格，從馬賽克瓷磚、大紅罩燈同菜式牌可以完全感受到呢一份經典🤩我同女友叫咗一個暖love love二人餐🥰，仙氣冰鎮咕嚕肉、脆脆鳳尾蝦多士同馬拉盞時菜炒牛肉煲。二人套餐包括酥皮焗花膠雲吞雞、櫻花蝦臘味煲仔飯同兩杯飲品。- 酥皮焗花膠雲吞雞酥皮好脆，估唔到酥皮同中湯味道幾夾🤣，入面有半隻雞，肉質唔會話好「嚡」，雲吞皮簿餡靚。- 櫻花蝦臘味煲仔飯飯粒夠乾身，入面有大量櫻花蝦、臘味同芋頭，口感豐富。另外豉油香甜，不過略嫌飯焦唔夠多。- 仙氣冰鎮咕嚕肉賣相幾壯觀，好似仙女下凡咁。肉質外脆內熱，而且無咗一般咕嚕肉嘅油膩感。- 脆脆鳳尾蝦多士一共有三件，多士炸到金黃香脆，上面嘅鳳尾蝦肉質彈牙，加上少少沙律醬，整體脆口惹味。- 馬拉盞時菜炒牛肉煲馬拉盞加通菜係我嘅飛佛，通菜爽口，加上口感滑溜嘅牛肉，送飯一流。飲品方面，我哋叫左仙氣冰鎮奶茶同白桃玫瑰果茶，飲品選擇幾多，以上兩款都唔錯。總結而言，巷仔見麵館真係好抵食，暖love love二人餐簡直係糧尾既恩物😍