串燒屋

營業中

休息中

自從搬走咗離開觀塘之後，好耐都冇嚟觀塘搵嘢食啦。不過聽朋友講，呢度有間任飲任食嘅串燒非常抵食，唔止有啤酒任飲，佢嘅串燒同埋烤肉同埋炸物都係任食㗎。一坐低我哋就嗌咗好多串燒先，有西冷牛又有一口牛，平時都起碼30幾蚊一串㗎。而且仲有大蝦，感覺上食幾串就可以回本啦。炸物方面，佢有炸蠔同埋炸榴槤炸魷魚炸蝦餅等等。我覺得佢既炸物就比較普通，都係留返個胃食烤海鮮同埋串燒啦。烤物方面佢有烤蠔，而且仲有清酒煮蜆，真係好大方。好少任飲任食嘅地方有蠔，有啲甚至連蝦都冇。加上佢嘅蠔係好新鮮，食落好大隻而且好鮮甜。同埋呢度最特別最好玩嘅地方係，佢嘅串燒係可以放上去自動轉嘅，我都係第一次見到呢個工具，真係好啱一大班人一路燒一路玩。而且又唔使自己返嚟返去，真係方便好食又好玩。而且佢嘅飲品係出去任攞嘅，出面除咗飲品之外，仲有好多唔同嘅甜品或者前菜。我就食咗幾個螺肉啦。而且佢嘅飲品仲有好多自己整嘅飲品，例如檸檬薏米水同埋洛神花茶，食飽最啱飲嚟消滯。呢間餐廳又平又好食又好玩，真係好適合一大班朋友一齊去。不過我今日去到都九點，但係仲係坐滿，如果想嚟食應該要記得book位或者早啲黎等啦。