CHOWTIME

營業中

休息中

今日朋友請食飯，佢話呢間餐廳坐得好舒服，仲可以慢慢傾計，所以揀左呢度。朋友點左個水波蛋卡邦尼意粉，我就食海蝦藜麥牛油果沙律。🍝水波蛋卡邦尼意粉水波蛋做得唔錯，大大隻蛋，又有蛋香，唔知係咪用左日本蛋呢?個人覺得呢個意粉都做得幾健康，因為煙肉比較少，反而菇有幾多，有大大片的雞脾菇、又有磨菇。🦐🥑海蝦藜麥牛油果沙律又係健康之選，無用沙律醬，反而用左黑醋汁，但個汁除左酸之外，仲微微帶甜，可能係加左蜜糖或者黑糖嚟調製，個味道同牛油果都幾夾。海蝦中等size，入口幾爽。🍋檸檬蛋白派最後我地仲加多左個甜品。蛋白霜經微烤成半熟，做成cream狀嘅檸檬批頂層，批底用左似係曲奇皮嘅蛋撻底，係鬆脆嘅。成個甜品口感非常特別，頂層蛋白霜係微溫加軟身，而底層嘅檸檬凝乳卻係清涼而又非常硬身。餐廳環境如朋友所言非常舒服，有室內位及室外位，室外佈置仲略帶泰國風情，感覺好有度假feel。侍應年青有活力、又幾有禮貎。總結，朋友真係無講錯，呢度非常適合朋友相聚傾計，夠靜又坐得舒服。