韓國錦城飯店 (已結業)

成班好耐無見既朋友，難得終於一齊有時間，當然要搵個地方一邊食一邊傾計啦！而點解選擇呢間餐廳，因為其中一位試過話唔錯，終是就決定一試啦！我地5個人去食，餐廳都安排左一間房比我地。我地點完餐一陣，侍應就送左幾碟小食黎，應該係免費既。小食都唔錯，雖然未必所有都會啱胃口，但感覺上都幾有韓國傳統特色，因為平時食韓國野最多都係送泡菜，唔會有咁多款式。今次叫左五花腩，侍應送上黎個陣係完整未切既，佢再係我地面前切開一塊塊放入個爐入面。本身個侍應走左，不過佢過左陣見到我地好似唔識整，佢就主動過黎幫我地整，再剪開得更細件方便我地放入口食，之後D肉熟晒再幫手放係隻碟上面比我地慢慢食。件五花腩肥瘦都算適中，點既醬油都唔會太鹹，都幾好食。我地仲叫左幾款餸同埋一個細既部隊鍋，個鍋既配料都好多，5個人分唔會話好飽，食埋其他餸就好飽啦！個鍋入面有D好細條腸仔，好似廚師腸既迷你版但味道好唔同，都幾特別。整體上，雖然人多但環境夠靜，食物味道都唔錯，侍應既服務真係好好，非常照顧食客。