型品牛排 (已結業)

今晚試咗個西冷五成熟($98)，加咗個海鮮酥皮湯連飲品既combo($45)。個湯都唔錯，酥皮好香牛油味；西冷到了！塊排面有啲類似七味粉既香料，將整塊排密封覆蓋，完全冇哂牛排既天然紋理，我都未落刀，中間一個小洞竟然噴出血泡泡，完全係有生命跡象。一切開就發現係二成熟，錯了，由左至右起，二成至六成，真係估佢唔到！我叫個waiter幫我再整熟啲，個waiter好有禮貌兼好有笑容。又上枱了，再嚟一次，塊排係之前嗰塊，七成熟，有啲鞋口。其實咁既價錢食牛排係咁既質素，我已有準備，不過咁既價錢我已經可以去食一碗勁好味既拉麵，我知道牛排同拉麵比較係有啲唔公平，但起碼食完好味既食物會好滿足。飲品我叫咗凍檸茶，幾好，可以沖走飽滯既感覺。埋單時，supervisor發現我食剩半塊西冷，佢問我意見，我講哂佢聽，佢同我講咗十次八次sorry，今時今日真係好需要呢種服務態度，我個人非常欣賞。呢間餐廳既廚師們仍有好有進步空間，盡管食材有限制，但加倍努力一定會做出更好既食物。