響 居酒屋 (已搬遷) 新店位置

星期五諗住食好啲，同事搵左呢間日本野試下。餐排都叫多選擇，由拉麵以至咖哩飯魚生飯都有。仲有多個廚師推介餐牌，價錢大概$70至百零蚊不等，諗住食好啲，點個$128嘅銀鱈魚定食。定食包茶碗蒸、麵鼓湯同飲品、雪米糍。一上菜就知衰，$128嘅定食，比兩舊細到不行嘅魚塊仔，仲要一舊係斬左半嘅。食過咁多間西京銀鱈魚，真係冇見過咁嘅份量。味道偏甜，尚可。到個刺身，一隻甜蝦兩件吞拿加兩件唔知咩魚，睇色都知唔新鮮，咬落硬到好似未溶晒雪。左下有墨魚海蜇，呢個最正常。沙律加蟹籽芝麻醬，還可以。除左食物，呢間野嘅服務都好唔得，叫侍應，佢睇到都完全唔理你，上菜又等得耐。冇下次。