梅光軒 (登龍街) (已結業)

同行朋友話呢間拉麵店好似不錯，雖然希慎都有一間，但佢話呢間比較好，所以最後穿過小巷試試呢間小店。即使係平日夜晚，呢間店都可能要等一等先有位。加上店內位置唔多，當晚除咗我同朋友，另外都有一組客人等緊枱。可能得兩個人嘅關係，等咗無耐就可以入座。我地分別揀咗味噌麻辣麵＆灸燒五花叉燒醬油拉麵。味噌麻辣麵自己都幾鍾意食物入面帶啲辣嘅元素，當然唔代表我好識得辣。所以叫咗呢款拉麵，一上枱已經香氣四溢。幾欣賞佢比咗隻可以掛係碗邊嘅匙羹我，咁就唔怕跌咗入碗啦haha。食物方面，拉麵煙煙韌韌。湯底其實唔太食到味噌味，只食到微鹹嘅湯同有少少辣。叉燒口感不俗，鬆軟易咬，唔會太肥。雞蛋無咩蛋白，感覺唔太吸收到湯味。灸燒五花叉燒醬油拉麵呢款係朋友點嘅，就唔多評論了。北海道汽球布丁（焦糖燉蛋）我地另外加錢要咗呢個汽球布丁，因為朋友不斷話好好玩又好食。好似篤咗幾下先爆haha。布丁都幾細舊，細過一個拳頭。另外有包焦糖燉蛋味嘅粉，我地開咗好耐都開唔到。好彩有個侍應叔叔見到，幫我地拎咗鉸剪先剪得開。加咗包野，食落真係有幾濃嘅焦糖燉蛋味，咬落都頗香。不過真係太細粒，食完都唔夠喉。