嚐仙 (已結業)

幾個月前夜晚七個人去過呢間食甜品，嗰陣個收銀員收緊錢，所以我哋就企喺門口等佢安排入座，點知隔離有一班大陸大媽自己行咗入去坐低，個服務員竟然唔理佢哋，我哋出聲話佢哋打尖，佢淨係幫我哋安排更加細嘅位，其實根本唔夠七個人坐。但之後我哋諗住食個甜品，就算數，冇再追究。（甜品中規中矩）隔咗幾個月，兩個人平日晏晝再去食，喺門口嗌完嘢食就入去坐低，得三成入座率，但係空嘅座位全部都冇清潔。我哋求其搵咗個位坐低先，諗住再舉手叫佢哋執嘢，但係一個人都冇。隔咗幾分鐘有個女仔捧住兜仙草過嚟，佢見到我哋枱濕晒，枱面仲有上手食剩嘅碗，但係佢竟然直接擺上去！我哋叫佢先執走，問佢攞多隻匙羹，佢黑口黑面咁樣話：「自己攞」。我以為佢冇手，所以遲啲先抹枱，點知佢執走咗，就冇再返過嚟，成個枱面仲有上手啲甜品漬，黐笠笠，仲要係好明顯嗰種，佢冇可能見唔到。甜品方面：仙草、珍珠、芋圓都冇乜問題，不過芋泥冇甜味好難食，食緊一舊芋泥質地嘅不知名物體咁。