茶餐廳2.0 (已結業)

同一般茶餐廳分別不是太大，叫咗個全日特色早餐配珍珠奶茶及南美燒豬仔骨配炸蝦跟意粉，另外再加$10要餐湯。全日早餐好快就到，食落去無咩特別，不用多說。之後到過燒豬仔骨，啲豬仔骨隻味唔錯，唔韌，用鐵板上，可以keep住熱。不過諗住跟意粉會係分開上(一般茶記或者其他西餐廳鐵板都係上面放扒及薯菜，飯或意粉就另碟上)，但係呢間就連意粉都係放喺鐵板上，令到啲意粉好快乾同硬及痴住塊鐵板。最令我失望嘅係佢個餐湯，佢個餐湯要加$10，我仲記得個侍應喺點餐時有問要咩湯，嗰時仲記得佢講有羅宋、忌廉同中湯，於是我揀咗羅宋。我食咗差唔多半個鐘，個鐵板餐都食咗一半先記得個羅宋湯未到，於是問過侍應，佢話「筆」緊，咁就繼續食啦，到差唔多食完時，見個湯都仲未到，於是就再問個侍應，點知佢都仲係話「筆」緊。我心諗你個湯駛唔駛「筆」成半個鐘呀，又唔係多客，於是佢隔一陣行埋嚟同我講無晒，要唔要中湯。聽到真係有啲興，我係加錢要羅宋，食完你先話無，又唔會退錢，服務真係麻麻。本身嘢食有影相，但諗諗吓綜觀大埔咁多好嘢食，呢度絕對唔建議同唔值得幫襯，所以無謂出相。