雞功房 (禧利街)

營業中

休息中

我哋入去嗌咗個豉油雞撈麵同埋雞片湯麵，豉油雞唔夠入味同埋嗰個雞片湯麵，嗰個雞片嘅質地就好鞋，其實食物就真係一般。服務態度方面，店內有一男一女嘅侍應，首先嗰個男侍應講嘢超大聲，大聲到會嚇親啲食客，我覺得佢可以減低個聲量。第二重點就係嗰個女侍應，首先我哋嗰張枱冇餐具，我哋問佢請問有冇餐具，佢竟然答我隔離檯有，叫我地自己拎，我心諗我問得出你就畀啦。之後發生一段小插曲，隔離檯嘅男食客叫左個豉油雞飯，但等左好耐都未來，就好聲好氣問嗰個女侍應個飯幾時來，但係嗰個女侍應不但止冇追單，然之後仲要大大聲好晦氣同嗰個男士客講要啲時間㗎等多陣啦，態度非常悔氣及無禮，好似畀人嘅感覺佢係客人而唔係服務人嘅侍應。由一開始入到呢間餐廳嘅感覺係俾人一種無形嘅壓力，因為男侍應同埋女侍應嗰個態度真係算係有啲無禮，而且畀人一種壓迫感。其實一餐飯食物質素固然重要，但都在乎係食客與侍應之間嘅交流。如果嗰個侍應咁嘅服務態度呢，我相信會係有啲趕客，我相信其他客人都會感受到嘅。價錢方便豉油雞撈麵大約八十幾蚊一個，雞片湯湯麵大約七十幾蚊。咁嘅價錢嘅食物我覺得唔值，另外加埋服務質素，我覺得係收得偏貴。總結，服務態度超差，食物質素一般。